Në një intervistë të hapur për “Ndryshe” me Elona Duro dhe Edea Demaliaj, Big Basta foli për ndryshimet e thella që ka pësuar skena muzikore shqiptare gjatë viteve. Reperi, një nga figurat më të njohura të hip-hopit shqiptar që nga fillimet e tij në fillim të viteve 2000, rikujtoi momentet më të rëndësishme të karrierës dhe ndikimin e festivalit “Top Fest” në promovimin e artistëve të rinj.
“Më vjen keq se gjithmonë më është dukur një festival i sinqertë, i drejtë, pa hile. Kishte shumë çmime. Ajo e bënte më të dukshme faktin që ishte pa hile, që kishte shumë çmime” – tha ai.
Basta shtoi se dikur mjaftonte që një këngë të transmetohej në “Top Albania Radio” ose në “Top Channel” për ta kthyer atë në hit. Sot, sipas tij, gjërat kanë ndryshuar rrënjësisht:
“Mos harro që ne jemi bërë gjeneratë facoletash njëpërdorimëshe. Gjithçka e kemi njëpërdorimëshe. Nuk e di nëse ka mbetur ndonjë që mund të jetë tek-tuk, por si produktet e atëhershme, si ‘Top Fest’ dhe rolin e madh që ka pasur ‘Top Albania Radio’ dhe ‘Top Channel’.”
Ai kujtoi edhe se si dikur, me pak mund të prodhoje diçka të jashtëzakonshme:
“Shiko, nuk besoj ta kem thënë diku, por ajo kënga na kushtonte 250 mijë lek të vjetra. ‘Sweet Company’ dhe Big Basta. Për inçizimin, master tek Edi Kraja, dhe ka qenë një shembull se si me pak, ti mund të bësh diçka shumë të mirë.”
Sipas Big Bastës, sfida e artistëve sot qëndron tek marrëdhënia e tyre me publikun:
“Sot e kësaj dite përse kanë një aversion ndaj të rinjve, unë mendoj se artistët po implikohen në shumë fusha të tjera të jetës, qoftë edhe padrejtësisht. Kam përshtypjen se artistët kanë filluar të bëjnë karshillëk kundrejt publikun.”
Në fund, reperi nënvizoi se ajo që dikur e bënte muzikën të paharrueshme nuk ishte vetëm talenti apo paratë, por sinqeriteti dhe pasioni i vërtetë që qëndronte pas çdo kënge.
