Big Brother VIP është bërë temë e ditës. Së fundmi, për dinamikat që po ndodhin brenda shtëpisë së famshme, ka reaguar dhe Sara Gjordeni, ish-banore e formatit.
Ajo shprehet se ekzagjerimi i situatave në kurriz të personalitetit të banorëve është jo-njerëzor dhe se formati ka humbur thelbin e tij si eksperiment social.
Sipas saj, shpërndarja e videove pa kontekst, memeve dhe komenteve sarkastike krijon një realitet të shtrembëruar për banorët, sidomos pas daljes nga shtëpia.
“Sado për të qeshur ose jo-normale të jenë disa situata në Big Brother, ekstra ekzagjerimi i tyre në kurriz të personalitetit të personazheve është disi jo-njerëzor.
Këtë e them jo vetëm si ish banore por edhe si vajzë. Shoh shpesh që edhe profile personale shpërndajnë meme, ose tallen me x apo y.
Të komentosh me nota ironie si publik që paguan për ta parë këtë format, deri në njëfarë mase është OK, por nuk e di pse më duket sikur BB është bërë format talljeje nga këndvështrimi i publikut. Nuk është më një eksperiment social, është territor mediatik që të jep pasaportën e pinjates dhe tani kushdo mund, dhe ka të drejtë të godasë mbi ty.
Nëse futesh, tani kanë të drejtë të të bëjnë qepaze qen e mace.
Më besoni, nuk ka gjë më të keqe sesa kur del nga aty dhe sheh 100 video për veten pa kontekst, pa histori të shpjeguar si e pse ndodhi një situatë apo pse ke thënë diçka.
Vetëm një përshkrim ironik pa thelb.
Për mua nuk ka njerëz më të këqinj e pa etikë se këta që e mbajnë veten për personalitete dhe krijojnë apo shpërndajnë momente të sikletshme të banorëve me komente sarkastike apo që u ndryshojnë kontekstin.
Dhe e fundit: Deri më tani nuk kam parë asnjë nga këta personalitete të futet e t’i provojnë pak vetë muret dhe kamerat aty, të shoh a tallen më me banorët”, ka shkruar ajo.
