Edhe pse Big Brother VIP 4 sapo ka përfunduar, entuziazmi i publikut nuk ka rënë aspak. Përkundrazi, ndjekësit janë më të etur se kurrë për të mësuar se kush do të jetë pjesë e edicionit të pestë të spektaklit më të ndjekur në vend.
Gjatë emisionit “Wake Up” në Top Albania Radio, moderatorja, Neada Muça, zbuloi disa nga emrat që mund të jenë pjesë këtë vit.
“Ka filluar që tani të dalin emrat e rinj të Big Brother të ardhshëm. Portalet po shkruajnë dhe kam disa emra për ju, uroj që t’ju pëlqejnë. Ka edhe një përshkrim për secilin prej tyre,” u shpreh Neada gjatë transmetimit live.
Sipas saj, në listë ndodhet Hygerta Sako, moderatorja sportive dhe ish-Missi i njohur, si dhe Isli Islami, prezantuesi simpatik i mëngjeseve televizive. Po ashtu përflitet Kelvi Kadilli, gazetari i njohur për humorin e tij thumbues, dhe gazetarja Kostana, një emër i njohur për publikun e “Wake Up”. Nuk mungon as Vitmar Basha, këngëtari dhe showman-i energjik e i paparashikueshëm.
Deri tani, asgjë nuk është konfirmuar zyrtarisht, por këto emra kanë ndezur menjëherë diskutimet në rrjete sociale. A do të jenë vërtetë këta banorët e rinj të BBV 5? Mbetet për t’u parë!
