Këngëtarja e njohur shqiptare Big Mama, aktualisht pjesë e spektaklit “Ferma VIP”, ka ndarë një histori tronditëse nga jeta e saj private, duke rrëfyer publikisht për herë të parë një lidhje abuzive që i ka lënë gjurmë të thella.
Në një moment reflektimi dhe guximi, Big Mama rrëfeu se marrëdhënia e saj e parë përfundoi në mënyrë të dhimbshme për shkak të dhunës fizike dhe psikologjike që përjetoi. “Filloi me xhelozi të madhe, presion psikologjik, më largoi nga shoqëria. Nuk isha më vetja ime,” tha ajo, duke treguar se abuzimi nuk ishte i menjëhershëm, por i vazhdueshëm dhe shkatërrues.
Një nga episodet më të rënda që kujton është ai kur partneri e kishte sulmuar fizikisht në mënyrë të dhunshme: “E fsheha, nuk doja të dilja në portale. Kisha hallin e familjes,” rrëfeu ajo, duke zbuluar se kishte qëndruar e heshtur për shkak të frikës dhe turpit.
Edhe pse lidhja ishte shumë serioze dhe, sipas saj, ata ishin “gati për t’u martuar”, Big Mama vendosi të marrë guximin dhe të largohet. “I dërgova një mesazh dhe i thashë që dua t’i jap fund,” tregoi ajo, duke shënuar kthesën në jetën e saj personale.
Në fund të rrëfimit, ajo përcolli një mesazh të fuqishëm për vajzat dhe gratë që mund të ndodhen në situata të ngjashme: “Mos iu përgjëro asnjë mashkulli. Bëhuni zonja e vetes suaj. Asnjë familje nuk ka fëmijë për të hedhur poshtë.”
