Në një bisedë të rrallë me CNN-në, këngëtarja e njohur Billie Eilish zbuloi detaje të pazakonta nga fëmijëria e saj, që për shumëkënd mund të tingëllojnë ekstreme, por për të ishin thjesht pjesë e një jete të ndërgjegjshme ndaj mjedisit.
Në intervistën e dhënë për emisionin “The Whole Story with Anderson Cooper”, ku ajo ishte së bashku me nënën e saj, aktivisten mjedisore Maggie Baird, Billie kujtoi mënyrën sesi ishte rritur. “Nuk kam pasur kurrë letra në shtëpinë time. Thjesht merr një peshqir të lagur dhe je mirë,” tha ajo me një ton të qetë, duke përshkruar një stil jetese minimalist dhe të qëndrueshëm.
Billie tregoi gjithashtu se kishte zhvilluar zakone të pazakonta për një fëmijë, siç ishte mënyra e kujdesshme me të cilën hapte dhuratat për të ruajtur letrën e ambalazhit: “Në ditëlindje isha ajo fëmijë që i hapte me kujdes dhuratat për të ripërdorur letrën e paketimit.”
Ndërkohë, nëna e saj shpjegoi më gjerësisht filozofinë që e ka udhëhequr familjen ndër vite. “U rrita kështu, por mendoj se kam edhe gjenet e mamasë sime, e cila kujdeset vërtet për botën dhe kafshët dhe nuk shpërdoron asgjë,” tha Billie. “Kishim atë jetë të thjeshtë, ku të gjitha dhuratat e Krishtlindjeve ishin në çanta të bukura që i qepja unë dhe i përdornim çdo vit. Nuk kishim letër ambalazhi dhe dieta jonë bazohej në vegjetarianizëm. Mësuam në shtëpi të varnim rrobat e lara.”
Por kontakti me botën e jashtme, siç shtoi Maggie, ishte shpeshherë një tronditje: “Pako dhe kuti brenda kutive brenda kutive të tjera. Është e frikshme, në një farë mënyre, të shkosh në ekstremin tjetër dhe të shohësh se çfarë po ndodh kur e di që kriza klimatike po përkeqësohet, se mjedisi po shkatërrohet dhe biodiversiteti po humbet.”
Të dyja, nëna dhe bija, duket se ndajnë jo vetëm lidhjen familjare, por edhe një ndërgjegje të thellë për çështjet e mjedisit – një filozofi që ka formuar jo vetëm jetën e tyre private, por edhe mënyrën se si e perceptojnë botën.
