Largimi i mundshëm i Blendi Fevziut nga televizioni ‘Klan’ ishte një nga lajmet më të bujshme të javës. U tha se Fevziu do të linte televizionin që punon prej më shumë 20 vitesh për të nisur një kontratë të re me ‘Top Channel’. Në fakt vetë ai nuk ka preferuar të flasë deri më sot për zërat që po qarkullojnë. Në një intervistë për gazetën ‘Panorama’, Fevziu ka treguar për herë të parë se si qëndron e vërteta. Ai ka thënë se ende nuk ka vendosur çfarë do të bëjë, megjithatë oferta e ‘Top Channel’ e tundon.
“Disa kohë më parë, në një bisedë me Ben Blushin, drejtorin e ri të ‘Top Channel’, kemi folur për disa pakënaqësi të miat në ‘Tv Klan’. Kanë qenë probleme që lidheshin me mënyrën konceptuale dhe funksionale të televizionit, për të cilat ka debate në çdo media. Ben Blushi më bëri një propozim për t’u bërë pjesë e ‘Top Channel’. Duke parë mënyrën se si ai Televizion po fuqizon linjën politike dhe gazetareske pas ardhjes së Blushit, u ndjeva i tunduar nga ky propozim. Deri tani nuk kam marrë asnjë vendim nëse do transferohem në Top, apo do të qëndroj në Klan”, – ka thënë ai. Megjithatë Fevziu ka shtuar se shumë shpejt do të marrë një vendim duke u bazuar tek ndjesitë dhe faktet që kanë më shumë rëndësi për të dhe stafin e tij. /revistawho.com
