Nuk është hera e parë që Bleona Qereti bën zhurmë të madhe vetëm me një status. E në fakt një prej arsyeve që publiku e do atë vajzë artiste, është edhe për faktin që “nuk pyet” dhe thotë gjithnjë e për çdokënd atë që mendon. Ndaj kështu u “gënjyem” të gjithë kur ditën e djeshme këngëtarja i kërkonte paratë që i kishin borxh produksioni “Dance with me” përmes llogarive sociale të Rozana Radit. Megjithëse Rozana e zhduku foton bashkë me komentin herën e parë, këmbëngulësja Bleona e rishkroi në një tjetër foto. Sigurisht që e gjitha kjo do të bëhej lajm në portale e gazeta. Madje edhe vetë produksioni i Klanit reagoi duke thënë se me Bleonën kanë shlyer çdo pagesë. Deri këtu gjithçka përbën një lajm të bukur showbiz-i, nga ata që tërheqin vëmendje të madhe. Mirëpo pasditen e sotme historia mori një kthesë, të cilën kuptohet që ia dha vetë protagonistja. Në një status të gjatë Bleona sqaronte se ishte gjithçka një shaka me mikeshën e saj Rozana Radi e se me regjisoren Grabocka dhe stafin e saj marrëdhënia mbetet e shkëlqyer. Më tej Bleona akuzonte gazetarët që prej statuseve të saj të shkurtëra, krijuan një telenovelë të gjatë. E përgjigja i erdhi pikërisht nga një gazetare, ndër më të mirat që kemi. Mira Kazhani shprehu vlerësimin e saj për Bleonën por njëherësh i tërhoqi vëmendjen se jo gjithnjë faji u duhet vënë gazetarëve, aq më tepër në rastet kur flitet për kode personale midis mikeshash. Por siç shprehet dhe analistja e moderatorja e Top Channel në komentin e saj, e gjitha bëri një bujë të madhe, e ndoshta ky ishte i vetmi qëllim. Më poshtë mund të lexoni fjalët e Qeretit e Kazhanit, teksa presim reagimin e radhës nga Bleona i cili me siguri nuk do të vonojë.
