Kompozitori i njohur shqiptar, njëherazi dhe babai i sopranos së njohur, Inva Mula, Avni Mula është ndarë nga jeta në moshën 92-vjeçare. Lajmi është bërë i ditur nga e bija e tij, Inva Mula, ku me anë të një postimi në rrjetet sociale shkruan: “Gjigandi jonë fluturoi në Valsin e Perjetësisë! Për një përshëndetje me dorë në zemër, homazhet kryen nesër, 30 tetor, ora 11:00-13:00 në hollin e Universitetit të Arteve, Tiranë. Avni Mula 04.01.1928 – 29.10.2020”.
Edhe personazhe të njohur kanë shkruar në llogaritë e tyre për këtë humbje të madhe, mes tyre moderatori i njohur Ardit Gjebrea dhe kryetari i bashkisë, Erion Veliaj.
“Tashmë u bashkuan në qiell!
Dhe unë kthehem në fëmijëri, kur muzika e Tij më dha emocionet e para:
“Kur këndoj për ty moj nënë”
“I ëmbël zëri i gjyshes”
“Për çdo vit në maj”
Sa shumë kujtime Avni Mula – paqe për Ty! Ngushëllime @invamula”, ka shkruar Arditi krah postimit të fundit në llogarinë e tij ku ka kujtuar disa momente nga fëmijëria e tij të cilat lidhen me krijimtarinë e kompozitorit, i cili ka lënë pas një sërë veprash artistike.
Ndërsa Veliaj ka ndarë disa foto të kompozitorit, shoqëruar me këto fjalë: “Fort i trishtueshëm lajmi i ndarjes nga jeta e Avni Mulës, një nga pasuritë më të mëdha njerëzore dhe artistike të kombit tonë. Arti shqiptar do t’i jetë ngahera mirënjohës për veprën e çmuar që la pas! ?
Ngushëllime Invës për humbjen e babait, emrin e të cilit Tirana e nderoi me sallën e koncerteve “Avni Mula” në rrugën e Dibrës për t’u kujtuar nga gjithë brezat! ??”.
Avni Mula lindi në Gjakovë në 4 janar të 1928, në një familje ku ishte i shtati fëmijë, më i vogli mes tre djemve dhe vajzave në atë familje.
Studimet e larta muzikore i kreu në Konservatorin “Çajkovski” të Moskës (1952-1957), ku u diplomua si këngëtar lirik, bariton. Gjatë studimeve ai u njoh dhe u martua me sopranon ruse Nina Mula me të cilën sollën në jetë vajzën e tyre, Inva Mula./revistawho.com
