Brad Pitt, një prej emrave më të mëdhenj të kinematografisë botërore dhe fitues i dy çmimeve Oscar, ka rrëfyer një moment shumë njerëzor gjatë një interviste në podcast-in “New Heights”, të drejtuar nga vëllezërit Jason dhe Travis Kelce. Aktori 60-vjeçar, i njohur për qetësinë dhe karizmën e tij në ekran, pranoi se edhe ai ka pasur momente kur është ndjerë i emocionuar përballë figurave të mëdha të ekranit.
I pyetur nëse ka ndjerë ndonjëherë mahnitje të vërtetë nga ndonjë personazh i famshëm, Pitt u përgjigj pa hezituar:
“Po, kur takova për herë të parë Geena Davis dhe Susan Sarandon… u trondita pak. Por më pas u qetësova.”
Tri yjet bashkëpunuan në filmin ikonik “Thelma & Louise” në vitin 1991, një projekt që për Brad Pitt-in ishte trampolina drejt famës globale. Roli i J.D., një hajdut i pashëm që tërheq vëmendjen e Thelma-s (Geena Davis), mbeti ndër më të spikaturit në fillimet e karrierës së tij.
Në një rrëfim tjetër për revistën W, Pitt foli me ndjeshmëri për përvojën gjatë xhirimeve, duke përmendur veçanërisht skenën e dashurisë me Davis-in.
“Geena ishte e mrekullueshme. E ëmbël, e kujdesshme dhe shumë e ndjeshme. Ajo u përkujdes që gjithçka të shkonte mirë. Xhirimet për atë skenë zgjatën dy ditë,” tregoi ai.
Ky rrëfim i Pitt dëshmon se, pavarësisht yllit të tij që ndriçon prej dekadash në Hollywood, emocionet dhe ndrojtja nuk janë të huaja as për më të famshmit.
