Një brez ikonash femërore po rikthen debatin global mbi moshën, bukurinë dhe presionin publik. Nga Cameron Diaz, Kris Jenner, Pamela Anderson te Sofia Vergara, Demi Moore, Kloe Kardashian e jo vetëm, gratë më të njohura të ekranit vazhdojnë të gjykohen jo për arritjet, por për mënyrën si plaken. Narrativa është e njohur, nëse zgjedhin ndërhyrje estetike, kritikohen, nëse plaken natyrshëm, sërish vihen në shënjestër.
Disa nga figurat më të njohura që përballen me komente të vazhdueshme për pamjen janë Khloé Kardashian, 41 vjeç, që shpesh kritikohet për “ndërhyrjet e shumta”, Meryl Streep, 76 vjeç, për “shumë rrudha”, ndërsa Kylie Jenner, 28 vjeç, etiketohet se “duket më e madhe për shkak të ndërhyrjeve kozmetike”. Edhe Kris Jenner, 70 vjeç, mbetet në qendër të komenteve për ndryshimin e dukshëm pas liftingut, një shembull i qartë i standardeve të dyfishta që industria vendos mbi gratë.
Debati shtrihet përtej një brezi. Cameron Diaz, 53 vjeç, është komentuar për vendimin për të plakur natyrshëm, Demi Moore, 63 vjeç, kritikohet sepse “nuk duket për moshën që ka”, ndërsa figura ikonike Carrie Bradshaw është kthyer në simbol të debatit për gratë që përqafojnë plakjen, por sërish gjykohen për këtë zgjedhje. Në të njëjtën kohë, Pamela Anderson, 58 vjeç, duartrokitet dhe kritikohet njëkohësisht për daljet pa grim, ndërsa Sofia Vergara, 53 vjeç, përballet me komente sepse vazhdon të theksojë sensualitetin e saj.
Në një epokë që promovon pranimin e vetes, realiteti duket më kompleks. Publiku kërkon autenticitet, por shpesh penalizon zgjedhjet personale. Artikujt dhe reagimet që rrethojnë këto figura nënvizojnë një mesazh të qartë, bukuria femërore vazhdon të matet me standarde të paqarta dhe kontradiktore, ku çdo vendim bëhet deklaratë publike. Por ndikimi i këtyre grave po riformulon debatin publik. Fokusi po zhvendoset nga rrudhat te trashëgimia, nga pamja te ndikimi.
