Këngëtarja e njohur Rovena Stefa ka zbuluar një histori personale të ndërlikuar, duke rrëfyer se kishte rënë në dashuri me një burrë të martuar pa e ditur këtë fakt. Gjatë pjesëmarrjes së saj në “Big Brother VIP”, artistja tregoi se mashkulli që dashuronte e kishte mashtruar duke fshehur që ishte i martuar dhe kishte fëmijë.
Rovena u shpreh se sapo e zbuloi të vërtetën, vendosi menjëherë t’i jepte fund lidhjes, duke deklaruar: “Nuk dua të prish familjen e askujt. Jam tërhequr menjëherë, pavarësisht mashtrimit që ka bërë ai.”
Ajo tregoi se kjo përvojë i kishte shkaktuar shumë dhimbje, por vendosi të mos tregohej hakmarrëse, duke mos informuar bashkëshorten e burrit për lidhjen e tyre. “Kur dikush mashtron, mund të jesh hakmarrës dhe t’i tregosh gruas, por unë këtë nuk e çoj në mend. Nuk kanë faj as gruaja dhe as fëmijët,” tha këngëtarja.
Rovena lidhi këtë ngjarje me këngën e saj “Burrë të martuar,” duke thënë se kënga frymëzohet nga kjo përvojë personale e jetuar vite më parë. Historinë e saj, ajo e përshkroi si një mësim të rëndësishëm për të mos prishur familjet dhe për të mbrojtur vlerat morale.
