Capital T ka vite që është pjesë e tregut muzikor shqiptar dhe thuajse çdo këngë e publikuar prej tij kthehet në hit. Artisti i njohur numëron një sërë këngësh në repertorin e tij muzikor, por vetëm këtë vit Capital do të mund të realizoj një koncert recital për kënaqësinë e fansave të tij. Reperi i njohur ka zgjedhur Tiranën për të performuar dhe duket se i gjithë koncerti do të jetë i niveleve të larta, lehtësisht i krahasueshëm me ato të yjeve botërorë. Capital T ka publikuar në profilin e tij në ‘Instagram’ një video, e cila zbulon se si do të jetë ndërtuar skenografia e koncertit dhe gjithçka duket se është menduar në detaje. Reperi ka treguar se kjo ka qenë një ëndërr e tij prej kohësh dhe se është i lumtur që më në fund po bëhet realitet. “Mbajeni mend këtë datë 19.09.19. Koncerti i parë i karrierës sime, i ëndërruar nga unë që në fillimet e mija po bëhet realitet. Dëshira, vullneti, puna e pa lodhur e një prej skuadrave më të mira po bëjnë të mundur që 19.09.19 të mbetet gjatë në kujtesën e secilit prej nesh. Sheshi Nënë Tereza”, ka shkruar Capital në postimin e tij.
https://www.instagram.com/p/B0jUfPrhjA9/
Siç duket koncerti do të quhet “Time Capsule” dhe me siguri reperi do të dhurojë një performancë elektrizuese. Capital T nuk ka zbuluar asnjë detaj më tepër në lidhje me koncertin, për të lënë gjithçka surprizë për në 19 shtator. /revistawho.com
