“Apple” është një kompani gjigande, e dyta në botë për nga vlera, ku gjithçka funksionon si një “orë zvicerane”. Organizimi në të është quajtur maniakal, për perfeksionin absolut që kërkohet. Mirëpo ndodh ndonjëherë, sigurisht shumë rrallë, që midis mekanizmave perfektë të shpëtojë edhe ndonjë gabim njerëzor. Kjo ndodhi pikërisht mbrëmjen e së dielës me CEO-n e kompanisë, Tim Cook. Ai ishte ndër radhët e tifozerisë në një ndeshje “Super Bowl” dhe si të gjithë, ka bërë një foto dhe e ka shpërndarë në ‘Twitter’. Duhet thënë se kjo foto është bërë vërtetë keq. Është një foto pa fokus ku mezi duket pamja dhe e ka bërë me dorën e tij, vetë shefi i “Apple”, kompania që prej vitesh i ka dhuruar botës ‘smartphone-in’ numër 1 të rruzullit. Pas kësaj ka shpërthyer ironia në web dhe “të shkretin” CEO e kanë masakruar. “Nuk po i bën dhe aq reklamë kompanisë tënde Tim!”, “Me një thekëse bukësh e ke bërë foton?”, “Duket që e ke bërë me iPhone”, ishin disa nga batutat. Kjo bëri që shefi i “Apple” të publikonte një foto të dytë vetëm pas një ore, por ironia për gafën e pasuesit të Steve Jobs nuk ka pushuar.
