Gjatë një interviste të dhënë në jug të Shqipërisë për emisionin “Pushime on Top”, Elton Ilirjani ka folur hapur për ndjenjat kontradiktore që e kanë shoqëruar pas publikimit të ndihmës së tij ndaj këngëtares së njohur Parashqevi Simaku. Ai rrëfen se megjithëse është krenar për kontributin e tij, nuk mund të mohojë ndikimin që kjo ka pasur në mënyrën se si publiku e percepton atë sot.
“Me rastin e Parashqevi Simaku, nuk e dija që kishte marrë dhenë. Ishte bërë një histori kombëtare. Dhe tani kur dal në rrugë, më pyesin për Parashqevinë, gjë që është shumë e mirë se unë atë e dua fort, e kam si mamin tim,” u shpreh Ilirjani.
Megjithatë, ai pranon se ndjen pak trishtim që përpjekjet dhe karriera e tij janë “sfumuar” nga kjo histori e vetme.
“Por, më vjen edhe pak keq, ndihem pak xheloz. Unë jam krenar për Parashqevinë, jam krenar për çfarë kemi bërë bashkë për përmirësimin e saj. Por, ajo që më shqetëson është që mos ndoshta kjo mbivendosje kaq e madhe, ma ka sfumuar pak karrierën mua. Kjo është hera e parë që e them,” deklaron ai.
Ilirjani thekson se kjo nuk vjen nga një ndjenjë zilia, por nga një shqetësim i sinqertë për punën e tij të përditshme dhe për gjithë angazhimet që nuk kanë marrë të njëjtën vëmendje.
“Nuk është xhelozi më shumë se sa është një merak për karrierën time. Çfarë duhet të bëj unë tani që shqiptarët të vendosin në plan të dytë shpëtimin e Parashqevi Simakut?”, përfundon ai.
