Chris Hemsworth ka rrëfyer se zbulimi i predispozitës së tij gjenetike për Alzheimer ishte momenti që i ndryshoi rrënjësisht mënyrën si e shihte jetën. Në një intervistë për Sky News, aktori e përshkroi këtë moment si një “pikë kthese” që e bëri të rimendojë prioritetet.
Gjatë xhirimeve të sezonit të parë të serialit Limitless: Live Better Now në National Geographic, një test gjenetik zbuloi se ai mban dy kopje të gjenit APOE4 – faktor që e bën 8 deri në 10 herë më të rrezikuar për zhvillimin e sëmundjes krahasuar me një person mesatar. Vetëm një në 50 persona trashëgon këtë kombinim gjenesh, dhe sipas studimeve, shumica shfaqin shenja të hershme deri në moshën 55 vjeç.
“Ishte një pikë në jetën time ku, deri në moshën 40 vjeç, mblidhje të dhëna dhe informacione, vepronje në mënyrë reaktive. Papritmas e kupton se një pjesë e identitetit që ke ndërtuar mund të mos jetë më e vlefshme. Brenda teje zgjohet një nevojë për të kuptuar më thellë, për të vënë në pikëpyetje qëllimin dhe ‘pse’-në pas asaj që bën… çfarë kërkon dhe çfarë ofron, në vend që të mendosh vetëm për atë që mbledh,” tha ai.
Pas këtij zbulimi, Hemsworth u fokusua në mënyrën se si mund të jetonte më mirë – duke kaluar më shumë kohë me familjen dhe miqtë dhe duke investuar energjinë e tij në gjëra me vlerë personale. Në sezonin e dytë të shfaqjes, ky ndryshim është i dukshëm. “Këtë herë isha shumë i përfshirë në organizim dhe prodhim, duke zgjedhur vende dhe tema që më interesonin ose kishin rëndësi personale. Ishte më shumë si gazetari përjetimore sesa si një konkurrent në një reality show argëtues dhe kërkues,” shpjegoi ai.
Një nga sfidat më të veçanta të sezonit të ri ishte ajo e mësimit të baterisë – për ta luajtur më pas në skenë me mikun e tij Ed Sheeran, para dhjetëra mijëra njerëzve. “Frika dhe ankthi ishin vërtet të larta,” pranoi ai. “Është e çuditshme se si situatat intensive mund të shkaktojnë hiper-fokus; është një mekanizëm mbijetese për trurin… dhe pastaj të mendosh se 70,000 njerëz janë ulur atje duke thënë: ‘Ju lutem mos na e prishni këngën tonë të preferuar.’”
Ky rrëfim i Hemsworth nuk është vetëm histori e një testi gjenetik, por edhe një kujtesë e fortë se ndonjëherë, përballja me frikën mund të të çojë drejt një versioni më të mirë të vetes.
