Ishte Fiorentina ajo që i vuri flakën lidhjes dymujore të fotomodeles nga Mirdita, Donës, me menaxherin nga Vlora, Musën. Ajo u tregoi vajzave të tjera se letrën e Musës, ku ai i shprehte premtimin e dashurisë, Dona e kishte hedhur te koshi i plehrave të tualetit. Sipas saj, një nga djemtë e kishte gjetur dhe ia kishte dhënë Musës, i cili më pas e kishte hedhur prapë në plehra.
Teksa bënin këtë thashethem pranë Donës, Musa iu afrua duke i kërkuar asaj letrën që i kishte shkruar kjo e fundit, në mënyrë që edhe ai ta hidhte në plehra. Ajo refuzoi t’ia tregojë, sepse Musa dëshironte ta griste dhe kjo nuk do ta bënte të humbte pikë si vajzë. Kaq u desh që të shpërthente konflikti mes tyre, pasi për Musën, Dona tashmë nuk meriton asgjë dhe ndaj as nuk dëshiron ta dëgjojë më kur ajo flet.
Më pas, ai mori kapakun e picës në të cilën i kishte shkruar “Të dua” dhe e hodhi po ashtu në koshin e plehrave, duke i demonstruar se lidhja e tyre tashmë ka marrë fund. Kjo krisje e marrdhënies erdhi pasi festuan dymujorin e lidhjes, që kur u bënë çift në shtëpinë e “Big Brother”. Musa, i cili mbahet si djali i detajeve, i ndihmuar nga banorët e tjerë si Elsamedi, Lupçe dhe Enida, i shkroi Donës një mesazh me gurë me gërmat e para të emrave të tyre dhe mbishkrimin “2 muaj bashkë”.
Ata u bënë çift në lojë, edhe pse vijnë nga realitete krejt të ndryshme. Dona vjen nga Mirdita, por për momentin jeton në Tiranë, ku është e përfshirë në shumë evente të botës së modës. Ndërsa Musa ka lindur në Vlorë, por në moshë të vogël ka emigruar drejt Italisë me familjen. Ata u vendosën në Romë, ku edhe jeton aktualisht.
Ëndrra e tij ka qenë të bëhej futbollist, por nuk mund të luante për shumë kohë sepse duhej të punonte e kujdesej për familjen. Aktualisht, Musa punon si organizator festash, punë që me sa duket nuk i ka dhënë fitime./ Panorama
