Rovena Dilo dhe Eltion Merja janë të njohur si një nga çiftet më të pëlqyer në ‘Dancing with the stars’. Kimia mes tyre dhe profesionalizmi ranë në sy gjatë dy edicioneve të fundit të spektaklit të vallëzimit. Tashmë balerini i njohur dhe këngëtarja e dashur për publikun po bashkëpunojnë për një projekt të dytë jashtë kompeticionit që i bashkoi. Bëhet fjalë për shfaqjen koreografike të quajtur ‘Be Different’ që do të mbahet më datë 28 dhe 29 maj në Universitetin e Arteve.
Rovena Dilon e shohim përsëri në rolin e një producenteje, ndërsa Eltion Merjan sërish si ideator dhe protagonist. Kjo shfaqje është e veçantë për mesazhin që përcjell, jo më kot dy personazhet e njohur të ekranit kanë vendosur ta risjellin. Ajo ka në qendër një njeri që sjell ndryshimin e monotonisë së përgjithshme, bëhet personazhi kryesor i krijimit koreografik. Ky njeri do tregojë me gjuhën e trupit, ngrohtësinë, ëmbëlsinë, egërsinë, “fuqitë” e ngjyrave që ka veshur në trup, se përse ai është modeli që dallon, se përse atë e veçon menjëherë nga e përgjithshmja, në një shoqëri e cila tenton vazhdimisht të të fusë në shinat e zakonshme të mentalitet standard. Mos e humbisni, kjo shfaqje premton emocion!/revistawho.com
