Ata përbëjnë një ndër çiftet më tërheqës në Shqipëri. Të pashëm, të kujdesshëm për pamjen e jashtme si për formën trupore ashtu edhe për stilin e veshjes, të qeshur e të dashuruar, mund të jenë model për ata që i shohin nga larg.
Megjithatë, sot Irena Kita dhe Arvin Kita ishin të ftuar në programin e Rudina Magjistarit dhe nga intervista e tyre mund të kuptoje që nuk janë një çift i admirueshëm vetëm së jashtmi.
“Më e rëndësishmja në marrëdhënien tonë është që para se të jemi bashkëshortë, jemi shokë dhe vazhdojmë flasim për gjithçka, çdo ditë. Një marrëdhënie fillon e humbet forcën kur nuk ka më bashkëbisedim ndërsa ne e kemi. Kemi arritur deri aty sa edhe kur nuk flasim kuptohemi me sy”, ka thënë Arvini.
Kështu edhe janë njohur, natën e ndërrimit të viteve 2008, 2009 kur humbën në një bashkëbisedim të gjatë dhe harruan ku ishin deri sa nisi të zbardhte. Irena në atë kohë ishte kthyer nga Italia ku kishte mbaruar studimet për Drejtësi dhe do vazhdonte studimet Master, për pushimet dimërore. E takoi Arvinin në një rreth miqsh të përbashkët.
“Ishte një nga ato bisedat ku humbet. Kur njerëzit rreth e rrotull kanë avulluar dhe ti ke ngelur vetëm me një person pa e kuptuar çfarë ka ndodhur dhe do donte të zgjaste pa fund”, ka treguar sërish Arvini, që në atë kohë për Irenën ishte Ervini.
“Për një javë ia dija emrin Ervin”, ka thënë ajo duke qeshur. Mirëpo pas dy javësh ata vendosën të bashkëjetojnë dhe pas dy vitesh u martuan. “Nuk ishte bombë që shpërtheu, gjithçka erdhi natyrshëm”, thotë shefi i kuzhinës që bashkë me partneren, avokaten bionde me një pasion të fortë për modën dhe sportet, ka fituar një gustatore të mrekullueshme.
Ai ka treguar që shija në veshje dhe kujdesi për pamjen ishte një nga pikat që e kanë tërhequr fillimisht, por as vetë Arvini nuk mbetet pas në këtë drejtim, sepse siç thonë miqtë e tyre, ata “kanë gjetur tenxherja kapakun” për sa i përket pasionit dhe dëshirës për të bukurën.
Ndërsa Irena, para se të dashurohej edhe më shumë me Arvinin me anë të mjeshtërisë së tij në kuzhinë, sigurisht u godit nga pamja e tij. “Arvini është një mashkull i bukur. Nuk mund të mos e vësh re këtë”, ka shprehur ajo vlerësimin për bashkëshortin, që duhet thënë që është objektiv.
Ata prej gjashtë vitesh janë të bekuar me një vajzë, Sofi, që i ngjan të atit fizikisht, por që e ëma e ka orientuar drejt pasioneve të saj për sportet, duke e shndëruar në një miksim të të dyve.
Janë si në fillimet e tyre Irena dhe Arvini megjithatë, me të njëjtën dëshirë për të komunikuar dhe me të njëjtin pasion që e mbajnë gjallë çdo ditë.
“Para pak ditësh kishim 8 vjetorin e fillimit të historisë sonë dhe dje i bleva një dhuratë Irenës për këtë datë të rëndësishme për ne”, ka thënë Arvini duke u hapur me siguri telashe shumë partnerëve që harrojnë edhe data më të afërta e më të rëndësishme në një marrëdhënie.
Megjithatë, edhe pse kaq romantikë e të dhënë pas detajeve, ata të dy kur u pyetën si do e festonin Shën Valentinin kanë thënë që nuk e festojnë.
“Është një festë shumë komerciale. Ne festojmë datat e rëndësishme të marrëdhënies sonë, ditëlindjen e vajzës, ditëlindjet e ne të dyve, kemi mjaft për të festuar. Shën Valentinin nuk e festojmë”.
Kushdo bën zgjedhjen e tij, por e tyrja, nuk e dimë pse, por tingëllon shumë bukur.
Burimi: Class
