Bebe Rexha ka zgjedhur të mos bëjë thjesht një rikthim, por një deklaratë identiteti. Me publikimin e projektit të parë nga albumi i saj i ri vizual “I Like You Better Than Me”, artistja me rrënjë shqiptare hap një kapitull të ri, ku estetika, muzika dhe origjina ndërthuren në një formë të kuruar me finesë pop. “Dirty Blonde” shënon nisjen e një serie prej 13 këngësh që do të publikohen gradualisht, secila e shoqëruar me videoklip.
Por është një moment i shkurtër në teaser-in përmbledhës të albumit që ka ndezur emocionin më të fortë. Kënga “Çike çike”. Në fragmentin e publikuar, Rexha surprizon duke kënduar në shqip vargjet: “Çike çike, luje belin çike. Ti je një bombë, bombë atomike”, duke e vendosur gjuhën e saj amtare në qendër të një projekti ndërkombëtar.
Nuk është thjesht një referencë folklorike apo një detaj nostalgjik, është hapja zyrtare e albumit me një kod identitar që i flet diasporës, por edhe industrisë globale që po e dëgjon me vëmendje.
Fakti që teaser-i i albumit hapet pikërisht me “Çike çike” nuk duket i rastësishëm. Në një kohë ku artistët ndërkombëtarë po rizbulojnë rrënjët si pjesë të narrativës së tyre artistike, Rexha e bën këtë me një lëvizje të qartë. Ajo nuk e përkthen veten për tregun, por e çon tregun drejt vetes.
