E ftuar së fundmi në emisionin “Ndryshe”, Çiljeta Xhilaga ka folur hapur për karrierën e saj dhe planet për një rikthim në skenë. Edhe pse vitet e fundit është larguar nga muzika, artistja vazhdon të jetë një prej figurave më të pëlqyera të showbiz-it shqiptar, me një karizëm që nuk shuhet dhe hite që ende dëgjohen nga një brez i tërë.
Kur u pyet nëse po mendon të publikojë një këngë të re, ajo u shpreh hapur:
“Jam karikuar të bëj një këngë të re, por do ta bëj vetëm nëse Flori Mumajesi rikthehet.”
Me humor dhe sinqeritet, Çiljeta shtoi se vetëm Flori mund t’i japë këngëve të saj shpirtin e kohës së saj:
“Vetëm Flori mund t’i bëjë këngët e kohës sime, ose do iki tek ai që më ka nxjerrë për herë të parë si këngëtare, që e falënderoj pafund Andi Lila.”
Artistja zbuloi gjithashtu përpjekjet e saj për t’u lidhur me producentin e njohur:
“I kam shkruar para dy muajsh: ‘Do kthehesh, se na ke lënë pa këngë’. Por nuk më ka kthyer përgjigje. Unë mendoj se do vijë një kohë që i gjithë brezi ynë do të rikthehet. Nuk e di, por kështu e ndjej.”
Duke komentuar ndryshimet në muzikën moderne, Çiljeta nuk kurseu kritikat:
“Brezi i ri është rritur me muzikën tonë, jo me këtë që bëhet sot. Kjo muzikë s’ka as melodi, as edukatë për fëmijët tanë. Do thuash ti ‘edhe ti i ke kënduar mollaqeve’, por unë nuk i këndova atyre të miave i kam kënduar atyre që i kishim të mëdhaja!”
Ndërsa publikisht pret një rikthim që lidhet me Flori Mumajesin, Çiljeta duket se është gati të ringjallë lidhjen e saj me muzikën shqiptare dhe nostalgjinë e një brezi që e ka bërë të njohur.
