Gjatë një bisede në “Ferma VIP”, Çiljeta Xhilaga ka rrëfyer për herë të parë historinë sesi është njohur me partnerin e saj, Alban Hoxhën. Gjithçka ka nisur nga një foto që i kishte kërkuar Albani, teksa ndodhej në lokalin ku Çiljeta këndonte.
“Pasi këndova unë, më kërkoi të bënim foto me ato sytë që i shëndrrisnin. Nxorri telefonin për të bërë foto, por iu fik në atë moment. Unë për ta nxjerrë nga sikleti i thashë s’ka gjë se e bëjmë me telefonin tim. Bëmë foton dhe ikëm te një lokal tjetër, po s’e kisha mendjen fare sepse isha në një situatë tjetër në jetën time, isha në pritje të gjërave të mia, kisha Fernandon e vogël.
Pas një jave doja të postoja një foto në Instagram, po Instagrami sa kishte dal atëherë. Gjej foton me Albanin, po e kisha harruar fare. Më pëlqeu vetja te foto dhe thashë po e postoj. Por nuk i mbaja mend emër mbiemër Albanit. Futem te faqja e gazetares që ta gjeja dhe e gjej. E postova foton dhe i bëra tag duke shkruar Follow të gjithë këtë çunin king të Kombëtares. Unë e kisha për t’i dhënë suport, asgjë më shumë se ai ishte më i vogël dhe mu dukte çunak. Biles moshën e kam pas problem në fillim, por ai ngaqë ka një qëndrim serioz, plus baba i një djali dhe duket i pjekur prandaj nuk e kam ndjerë diferencën.
I kishte plas Instagrami atij me follow. Më shkruan ky: O Çili o zemra po më shpërthen Instagrami. Kështu filluam të flisnim, thamë t’i bëjmë çunat shokë. Madje takimin e parë e kemi bërë në një lokal për fëmijë. Në fillim kemi qenë si shokë, duke treguar hallet e jetës. Kur më mori me vete në ndeshjen e parë, aty e pashë me sy më ndryshe. Kështu nisi historia jonë. U bëmë 8 vite tani”, tregoi Çiljeta.
