Këngëtarja e njohur, Dafina Zeqiri, është rikthyer në skenën muzikore me një projekt të ri, pikërisht me këngën “Four seasons” e publikuar në iTunes. Dafina ka zbuluar përmes Instagramit se ka realizuar ëndrrën e saj për të shkuar në Shtetet e Bashkuara të Amerikës e për të qenë pjesë e tregut ndërkombëtar.
“Sot po e lançoj këngën time të parë (Four Seasons). Është ëndërr e bërë realitet. Jam përherë falënderuese për ekipin e mrekullueshëm, që besoi në talentin tim dhe jam shumë e lumtur të prezantoj këngën time të parë ‘Four Seasons’, ka shkruar ndër të tjera Dafina në Instagram.
Nuk ka munguar as komenti i Noizy-t, reperi i cili nuk fliste më parë me Dafinën për shkak të konflikteve mes tyre. Ai ka postuar këngën e re të Dafinës dhe ka shprehur mbështetjen e tij. “Një tjetër nga Dafina, por këtë herë është internacionale. Le t’i tregojmë dashurinë dhe mbështetjen tonë.
Më shumë shqiptarë po bëhen internacionalë. Punë e shkëlqyer”, shkruante Noizy. Po a po prezantohet Dafina si shqiptare në tregun ndërkombëtar? Faktet tregojnë që jo. Në të gjitha portalet apo skedat biografike ndërkombëtare, Dafina Zeqiri prezantohet si artistja e lindur në Suedi, fakt që këngëtarja nuk përpiqet ta ndryshojë, duke anashkaluar kështu origjinën e saj shqiptare./ Panorama
