Një pjesë e shqiptarëve, por edhe vizitorët e huaj, me siguri duhet ta njohin mirë kopshtin zoologjik në Fier të quajtur ‘Safari Zoo Park’. Pikërisht ky vend u ka tërhequr vëmendjen edhe mediave të huaja, që shkruajnë hapur për gjendjen tronditëse të këtij kopshti zoologjik. ‘Daily Mail’ me anë të një shkrimi të gjatë dhe disa fotografive ka ilustruar kushtet aspak të përshtatshme në të cilat jetojnë kafshët dhe e cilëson si një kopësht zoologjik të dalë nga ferri. Në shkrim thuhet se fotografitë janë shkëputur nga ‘Safari Park Zoo’ në Fier, në të cilat paraqitet një luan i kequshqyer, me një dëmtim në sy dhe i futur në një kafaz të ngushtë.
“Kafshë të tjera, duke përfshirë një zebër, një ujk të dobët, disa drerë, janë parë të mbyllur në një kafaz betoni në parkun zoologjik me pronësi private”, – shkruan ‘Daily Mail’. Fotografitë janë realizuar nga një fotograf anonimë, për të ekspozuar të gjitha kushtet në kopësht.
Gjithashtu thuhet se në të kanë lindur edhe 14 luanë të vegjël, një pjesë e të cilëve kanë ngordhur, janë shitur ose dhuruar tek personat e afërt të pronarit. ‘Daily Mail’ shton se për këtë ka reaguar edhe organizata ndërkombëtare e mirëqenies së kafshëve, “Katër Putrat”, e cila e quajti situatën në kopshtin zoologjik ‘absolutisht të papranueshëm’ dhe se duhet gjetur sa më parë një zgjidhje. /revistawho.com
