Dasma simbolike mes Gimbos dhe Selin ishte një moment që për shumëkënd brenda dhe jashtë shtëpisë së Big Brother VIP u përjetua si diçka shumë më reale. Momenti ka ndezur rrjetet dhe komentet e publikut. Tani, për herë të parë, reagimi ka ardhur edhe nga familja e dhëndrit, përmes motrës së tij, Ajetës.
E ftuar në emisionin “Goca & Gra”, ajo foli me tone të ngrohta për çiftin dhe emocionet që ka sjellë ceremonia brenda shtëpisë së BBV, duke lënë të kuptohet se për familjen e tyre kjo histori mund të jetë më shumë se një moment televiziv.
“Nusja na duket yll, nuk besoj se ka pasur një dasëm më të bukur se ajo që keni parë në BBV mbrëmë. Shumë të lumtur prindërit, është dasëm e BBV, traditë, nuk është se e morëm prej vërteti, atë do e bëjmë jashtë. Ata dukeshin shumë mirë, çift i bukur”, u shpreh ajo, duke nënvizuar atmosferën festive që shoqëroi ceremoninë.
Por përtej spektaklit, Ajeta la të kuptohet se familja e Gimbos e sheh me respekt edhe anën kulturore dhe tradicionale të këtij bashkimi.
“Mbrëmë e ka dëshmuar që Selin mund të jetë një nuse e Kosovës, me traditat tona. Nusja duhet të jetë ashtu me veshje kombëtare dhe muzikën kombëtare”, tha ajo, duke shtuar se kontaktet mes familjeve ende nuk kanë nisur zyrtarisht, por pritet të ndodhin pasi dy banorët të dalin nga shtëpia.
Në fund, motra e Gimbos la edhe një mesazh mbështetjeje për çiftin, duke pranuar se fillimisht familja e kishte parë lidhjen si pjesë të lojës.
“Unë si motër e Gëzimit (Gimbos), duke e njohur dhe parë, shoh lumturinë dhe gëzimin, edhe të Selin, mendoj që dasma do të zgjasë edhe jashtë. Tani besoj edhe se Selin ka të njëjtat ndjenja, në fillim nuk kishim këtë mendim, por tashmë dallohet interesi i saj. Ne gjithmonë e mbështesim”. Një deklaratë që e zhvendos historinë nga spektakli televiziv drejt një pyetjeje: si do të vazhdojë kjo dashuri kur loja të bëhet akoma më e fortë?
