Dea Mishel ka zgjedhur të flasë hapur për një temë që shumë e shmangin: ndërhyrjet estetike dhe pasojat e tyre. Në një intervistë të fundit, ajo ndau përvojën personale, duke treguar se jo çdo trend sjell rezultatin e dëshiruar dhe se pendesa mund të vijë shumë shpejt.
E ftuar në emisionin “Mirëmbrëma Yje”, blogerja pranoi se u ndikua nga moda e momentit për të fryrë buzët, por efekti përfundimtar nuk kishte asgjë nga ajo që kishte imagjinuar. Sipas saj, ndryshimi në pamje ishte i menjëhershëm, por edhe zhgënjimi po aq i shpejtë.
“Më dukej vetja tamam si ajo shprehja ‘buzëviç’, sepse më kishin dalë tepër të enjtura. Gjë më të keqe nuk kisha bërë ndonjëherë në fytyrën time,” u shpreh Dea.
Ajo tregoi se vendimi për ta kthyer pas ndërhyrjen nuk u diktua vetëm nga pasqyra. Reagimet në familje e bënë situatën edhe më të sikletshme, duke e bindur se kishte bërë një zgjedhje të gabuar.
“Babai më thoshte se duhej të ndërroja foton e pasaportës dhe u bullizova nga e gjithë familja, ndaj sapo ra enjtja fillestare i shkriva,” tregoi ajo.
Ajo që e bën historinë edhe më të pazakontë është fakti se Dea e ka përsëritur të njëjtin hap dy herë. Në të dy rastet, sipas rrëfimit të saj, ka vendosur t’i heqë mbushësit brenda pak ditësh, duke pranuar se përvoja nuk ishte aspak ajo që priste.
