Askujt nuk i ka shpëtuar debati publik shumë i zhurmshëm që pushtoi mediat pak ditë më parë. Sabri Fejzullahu dhe Flori Mumajesi patën një konfrontim me fjalë që siç duket nuk ka marrë zgjidhje. Kur situata është ende e tensionuar, ka ardhur edhe reagimi i parë nga Ermal Fejzullahu, djali i këngëtarit të njohur.
I ftuar dje në ‘Një kafe prej shtëpisë’, ai ka dhënë opinionin e tij për këtë ngjarje që sigurisht e ka prekur shumë.
“Më ka ardhur keq për atë gjë që ka ndodhur me thënë të drejtën sepse duke patur parasysh që babai im është pak tip që ka temperament, ndoshta duhet menduar që një plak 75-vjeçar lëshon edhe ndonjë fjalë pa lidhje. Mua më erdhi keq nga kolegu, nga Flori sepse ka bërë një reagim që nuk i ka hije, duke patur parasysh moshën, karrierën, apo zhargonin që kishte përdorur në atë postim. Më është dukur e ulët”,-mësohet të jetë shprehur Ermali.
Më tej ai ka shpjeguar se ka kontaktuar drejtpërdrejtë me Florin duke e telefonuar me një kërkesë të vetme, fshirjen e postimit të bujshëm.
“E thirra me burrni. I kam thënë që të isha lutur të kishe parasysh që im atë ka një moshë. Meqë ti je ndjerë i ofenduar, s’di a e ke mizën pas veshi, por fshije atë farë postimi. Sido që të jetë, jeta është e gjatë. Unë atij i uroj sukses dhe shëndet”,-e ka përfunduar fjalën këngëtari.
Kujtojmë se debati nisi pak ditë më parë, pasi Sabri Fejullahu përmendi emrin e Florit teksa fliste për blerje klikimesh. Kantautori reagoi ashpër me një postim në ‘Instagram’ dhe gjendja vazhdon të mbetet e tensionuar. /revistawho.com
