Një ngjarje e ndërlikuar ka përfshirë këngëtaren e njohur Parashqevi Simaku, familjen e saj dhe aktorin Herion Mustafaraj. Aktori u akuzua nga familjarët e saj se ka hyrë në dhomën e hotelit ku po qëndronte Parashqevia, pa lejen e tyre.
Pas shumë deklaratash publike nga të dyja palët, Elton Ilirjani, biznesmeni që ka ndihmuar Parashqevinë gjatë javëve të fundit, ndau një reagim të gjatë për të sqaruar atë që ka ndodhur.
“Kanë qenë dy ditë të vështira dhe me shumë ngjarje. Të gjithë e kanë parë në media se çfarë ka ndodhur mes familjes Simaku dhe Herion Mustafarajt. Është një situatë e komplikuar e cila më shumë ka lindur nga keqkuptimi. Nuk mendoj që ka pasur keqdashësi nga të dyja anët. Unë jam në mes dhe më ka interesuar vetëm mirëqenia e Parashqevi Simakut.
Fakti që familjarët e Parashqevi Simakut janë njerëzit më të afërt të saj, nuk ka pse të diskutohet nga askush, nuk ka pse të vihet në diskutim nga asnjëri prej nesh, sepse të gjithë e dimë sa e rëndësishme është familja për shqiptarët, për çdo shqiptar; për mua, për ju që më dëgjoni tani dhe aq më tepër për Parashqevi Simakun, që familja është gjëja më e rëndësishme, pavarësisht se ç’mund të ketë biseduar në të shkuarën e largët ose në një moment delikat, siç mund të bëjmë të gjithë.
Unë jam i bindur dhe çfarë kam dëgjuar dhe çfarë kam parë me sytë e mi këto ditë. Parashqevi Simaku ka një dashuri të madhe për familjen e saj, për vëllanë e saj, mbesën e saj Inën dhe nipin e saj, Ani Simak. Kuptohet, dashuria më e madhe e saj është Luke, që ajo do takohet së shpejti, brenda tri ditësh besoj dhe kuptohet, edhe ish-bashkëshorti i saj, Robert.
Dashurinë që ka për familjarët, edhe pse nuk është në gjendjen e saj më të mirë. Dashurinë që ka për nipin e vet, unë e kam vërejtur dhe e shoh çdo ditë. Nuk duhet vënë në diskutim dashuria që ka për familjarët e vet. A ka dashuri ajo për miqtë e saj? Po. Një ndër miqtë e saj të hershëm është Herion Mustafaraj. Po të isha gjaknxehtë do kisha thënë 1 mijë e 1 të zeza për të, se çfarë nuk ka thënë për mua, më quajti dhe luani me tanga. Këto janë situata delikate dhe kërkoj gjykim të ftohtë. U jap të drejtë familjarëve të reagojnë.
Përse Herion Mustafaraj është kaq i përfshirë? Ai ka qenë një ndër njerëzit më të afërt të saj. Ajo ka jetuar te shtëpia e tij, nëna e Herionit e ka mbajtur në shtëpi. Unë nuk jam mosmirënjohës, dhe ajo është mirënjohëse dhe e do Herionin dhe e vlerëson si vëlla, dhe ai si motrën e tij. Deri këtu jemi në rregull, por ku lindi problemi mes Herionit, Elvirës dhe mua dhe familjarëve? Lindi ditën kur Elvira më 15 dhjetor e gjeti dhe unë u bashkova me ato.
Atë ditë Parashqevia ishte takuar me Herionin dhe i kishte thënë do takoj këtë zonjën. Atë ditë lindi debati i madh. Herioni kishte qëllime të mira, por duhet të kuptonte që ishim të angazhuar për t’i gjetur një ambient dhe një strehë të qetësohej.
Ne donim t’i jepnim ndihmën e shpejtë Parashqevisë. Unë nuk po i përgjigjesha sepse nuk e njihja, kisha shumë telefonata dhe shumë mesazhe. Elvira jep një intervistë dhe një deklaratë dhe keqkuptohet. Pasi ndodhën të gjitha këto, me të drejtë, Herioni u mërzit. Mendoi se po evitonim, por Parashqevia donte vetëm të fliste me të birin. Kishte një qëllim dhe kjo zonjë që të vinte nga rruga me ne hotel. Me të drejtë ai u mërzit, mendoi se ne nuk po e linim të fliste me Parashqevinë.
U mërzit ai çfarë nuk tha për mua. I thashë qetësohu, unë kam dashur që inati të qetësohej dhe të vendosej një komunikim mes tij dhe familjarëve. Nuk kam bërë gabim që jam përpjekur që çdo komunikim të kalonte përmes familjes së saj. Jam përpjekur të informoheshin familjarët. Ata menduan që Parashqevia nuk duhej të përballej me debate me tema të forta, ajo kishte një problem, prandaj doli në rrugë. Di të them që temat e forta nuk i bënin mirë dhe donim ta mbronim. Një rastësi e paimagjinueshme.
Herioni punonte në hotelin ku ishte strehuar Parashqevia. Elvira ishte shumë mbrojtëse ndaj Parashqevisë, unë më i tërhequr dhe më studiues. U vendosa menjëherë në komunikim me të. Vëllai i Parashqevi Simakut kishte pasur një përplasje me Herionin, përplasje mes dashurive të ndryshme. Nuk mendoj në asnjë moment që Herioni do ta dëmtojë Parashqevinë, prandaj i thashë merre me ngadalë, mos u përplasni në sy të Parashqevisë. Përplasja nuk u evitua…”
Ilirjani theksoi se e gjithë situata u ndërlikua nga keqkuptime dhe emocione të forta, por në fund, qëllimi kryesor ka qenë dhe mbetet mirëqenia e Parashqevisë.
