Doktoresha Migena Gega edhe këtë javë ka sjellë këshillat e saj për shëndetin e lëkurës. Tema e kësaj jave është kujdesi për zonën intime. Duke qenë se rëndësia e tij është tepër e madhe për të shmangur probleme që mund të kthehen në shumë serioze, dermatologia Migena ka dhënë disa këshilla shumë të vlefshme.
Kur vjen puna tek higjiena, e cila është një pikë e rëndësishme që ndihmon në shmangien e problemeve në zonën intime, Dr. Migena rekomandon të përdorni për shpëlarje një solucion që nuk dëmton apo irriton PH në atë zonë. Ajo thekson që duhet fshiheni me pecetë të thatë në mënyrë që të shmangni lagështinë që shton predispozitat për myk.
Gjithashtu për ato vajza që kanë filluar marrëdhëniet seksuale, ajo rekomandon të përdorin masa mbrojtëse për të mos lejuar prekjen nga sëmundjet seksualisht të transmetueshme, të cilat janë shtuar shumë. Duhet të bëni një kontroll një herë në vit nëse nuk keni shqetësime, e nëse shikoni që keni sekrecione të pazakonta apo erë të rëndë duhet të bëni dhe analizë të sekrecioneve vaginale.
Një tjetër shqetësim i lexuesve të ‘RevistaWho.Com’ është edhe depilimi. Një nga pyetjet më të shpeshta lidhet me mënyrën më të mirë të depilimit. Edhe për këtë pjesë, Dr. Migena ka një përgjigje. “Mënyra më e mirë për t’u depiluar është ajo, pas të cilës ju nuk keni efekte anësore. Nëse depilimi me dyll, ju le shenja, ju krijon puçrra e mira është të përdoret depilimi me lazer, i cili nuk ka efekte anësore. Por tek personat me lëkurë shumë të ndjeshme rrallëherë ndodh që të mos tolerojnë dhe lazerin. Pra zgjedhja mbetet në varësi të efekteve që keni kur aplikoni njërën apo tjetrën procedurë”,-shprehet ajo.
Nëse jeni besnike e debilimit me dyll dhe shpeshherë keni probleme me acarimet post-depilimit, doktoresha sugjeron përdorimin e aloe vera xhel ose kremit epitelizues me oksid zinku pasi ka mbaruar procedura. Ndërsa nëse dalin puçrra të vogla me qelb, mund të shtohet përdorimi i ndonjë antibiotiku lokal, në varësi të problemit që mund të keni./revistawho.com
