Me ndryshimin e kohës, duart tona janë më të ndjeshme, prandaj kanë nevojë edhe për një kujdes më të madh.
Të gjithë pajtohen se duart dhe thonjtë flasin shumë për një person dhe meqë me shtrëngimin e duarve realizojmë kontaktin e parë dhe lëmë përshtypjen e parë, është me rëndësi që të mundohemi që gjithmonë të kemi duar të lëmuara dhe të buta. Më poshtë po ju tregojmë disa këshilla si të kujdeseni për duart tuaja.
Kur i lani enët, gjithmonë duhet të vini dorza të gomës, meqë gjatë kësaj pune, duart ekspozohen ndaj substancave të shumta kimike që e largojnë yndyrën, jo vetëm të enëve, por edhe të duarve. Për këtë shkak, duhet ta evitoni larjen e shpeshtë të duarve gjatë ditës.
Disa herë në javë duhet t’i lyeni duart me krem natyror për duar, apo edhe më mirë, me vaj kokoje. Kremin ushqyes për duar mund ta përgatitni edhe ju në shtëpi: përzieni gjalpin pa kripë me pak mjaltë dhe me bimë hithi.
Një herë në javë, apo të paktën një herë në muaj, duhet ta bëni pilingun e duarve, i cili i largon qelizat e vdekura nga sipërfaqja e duarve. Pas bërjes së pilingut, duart e thithin më mirë kremin dhe preparatet tjera. Pilingun e duarve mund ta bëni edhe ju në shtëpi: përziejeni gjysmë luge kripë dhe dy lugë vaj ulliri.
Lyeni duart me këtë masë dhe, pasi e kini lënë të rrijë disa minuta, shpërlani mirë duart dhe veni krem hidratues për duar, apo vaj, sidomos rreth thonjve. /revistawho.com
