Avioni i Malaysia Airlines i cili u zhduk në mars të vitit 2014, është përplasur me sipërfaqen e ujit në Oqeanin Indian ndërkohë që askush nuk ka qenë në kabinën e pilotit në momentet fatale.
Të dhënat vijnë pas kërkimeve të byrosë australiane të sigurisë së transportit. Sipas tyre, avioni ka qenë në rënie të lirë pas mbarimit të karburantit. Kërkimet mbështeten edhe nga të dhënat e mbledhura nga satelitët. MH370 u zhduk papritur në muajin mars të vitit 2014 ndërsa fluturonte nga Kuala Lumpur në Pekin, me 239 pasagjerë në bord.
Ngjarja tragjike vijon të konsiderohet si një nga misteret më të mëdha ajrore në botë. Raporti gjithashtu thotë se nga analizat e një prej mbetjeve të krahëve të avionit, është gjetur se Boeing 777 nuk ishte i konfiguruar për të bërë ulje në det./ TV KLAN
