Policia ka dhënë detaje të reja në lidhje me ekzekutimin e 37-vjeçarit nga Elbasani mbrëmjen e djeshme në qytetin e tij. Ndërsa fillimisht u tha se Erion Mihallari u vra me thikë, sot policia konfirmon se ndaj viktimës është bërë atentat dhe është qëlluar me armë zjarri.
Blutë e Elbasanit bëjnë me dije se 9 persona janë shoqëruar në komisarit si dëshmitarë dhe të dyshuar por nuk kanë dhënë detaje në lidhje me ngjarjen, duke refuzuar kështu çdo informacion për rrethanat në të cilat u ekzekutua Mihallari, i kthyer prej pak kohësh nga emigrimi. Ata janë shprehur se nuk kanë arritur të shohin gjë për shkak të errësirës.
Burimet kanë thënë për gazetën “Panorama” se në polici janë shoqëruar mbi 20 persona (në kundërshtim me deklaratën e policisë për 9 persona) dhe se ende nuk dihet se cilët janë autorët.
Sipas burimeve, 37-vjeçari ka qenë duke lëvizur me mjetin e tij drejt stacionit të trenit me destinacion një lokal që ndodhet poshtë pallateve të kësaj rruge. Aty dyshohet se i kanë zënë pritë të paktën dy persona dhe njëri prej tyre e ka qëlluar me armë zjarri.
Viktima frekuentonte shpesh zonën në fjalë dhe dyshohet se ai është ruajtur më së miri nga autorët. Mihallari më herët ka qenë emigrant.
