Devis Muka: Femrat kur bëhen nëna janë më tërheqëse

Para afër gjashtë muajsh përjetoi ndjesinë e babait, kur mori në dorë për herë të parë vajzën, Negin. Për aktorin Devis Muka tashmë jeta ka ndryshuar, pasi fëmija i ka dhënë një tjetër kuptim lidhjes disavjeçare me ekonomisten Nertila Teme. Artsti 31-vjeçar , që e shohim të dielave si protagonist të rubrikës “Pa limit” në “E diell”, paralelisht ka luajtur edhe në shfaqjen “Zbutja e kryeneçes”. Në një intervistë për gazetën “Panorama”, Muka tregon detaje të jetës së tij si baba e si bashkëshort. “Lindja e vajzës më ka ndryshuar totalisht jetën, por për mirë. Vajza ime është energjia kryesore që kam. Jeta bëhet më e vështirë por sfidat më të bukura kur ke një qëllim të pastër përpara. Pas ardhjes së fëmijës pasioni me partneren rritet pasi, e para, femrat kur bëhen nëna janë më tërheqëse; e dyta dhe më kryesorja është se tani kemi një dashuri që na bashkon edhe më shumë”, tregon ai.