Prestigjiozja britanike Daily Mail i ka kushtuar një artikull ardhjes së Rita Orës në Shqipëri. “Disa gjëra në jetë nuk harrohen kurrë: Rita Ora shkëlqen e veshur me body dhe tiranda teksa performon një koncert gjigant falas në Shqipëri”, është titulli i Daily Mail.
Duke publikuar disa foto nga performanca, artikulli brenda vazhdon: Rita Ora dha një shfaqje spektakolare teksa doli në skenë për një koncert gjigant falas në Shqipëri. Këngëtarja, 31 vjeçare, ka lindur në Kosovë nga prindër me origjinë shqiptare, përpara se të shkonte në Londër, por ajo e quan Tiranën, kryeqytetin e Shqipërisë, si shtëpinë e saj. Të martën, Rita u ngjit në skenë në sheshin Skenderbej në Tiranë ku performoi 14 këngë falas, një moment që ajo e cilësoi si ‘të paharrueshëm’. Rita dukej në çdo pëllëmbë një yll pop-i me një body të zi të tejdukshëm me mëngë të gjata, mbuluar me modele temine me shkëlqim. Ajo e kombinoi veshjen me një palë geta të ngjashme dhe çizme me taka. Veshja e saj ishte krijuar nga stilisti i njohur Valdrin Sahiti, i cili ka bërë veshje për Beyonce, Cardi B, Paris Hilton dhe Angelica Ross. Rita tregoi lëvizjet e saj të kërcimit teksa performoi me disa kërcimtarë dhe pas performancës u ndezën fishekzjarre dhe flakë. Në një moment, Rita u pa duke ngritur me krenari flamurin shqiptar. Rita e hapi koncertin me këngën e vitit 2019 “Ritual” përpara se të këndonte një përzgjedhje të hiteve të saj më të mëdha, duke përfshirë Your Song dhe Hot Right Now dhe e përmbylli me Lonely Together dhe këngën Anywhere. Koncerti falas u organizua nga kryetari i Bashkisë së Tiranës Erion Veliaj për të festuar shpalljen e Tiranës si Kryeqyteti i Rinisë së BE-së për vitin 2022. Duke folur për koncertin Rita tha se nuk do ta harrojë kurrë shfaqjen në vendin e prindërve të saj. Gjatë qëndrimit të saj, Rita u nderua me Urdhrin Naim Frashëri nga Presidenti i Shqipërisë, z. Bajram Begaj. Ajo tha: “Ka disa gjëra në jetë që nuk harrohen kurrë, ky udhëtim do të jetë një prej tyre. Sot ka qenë një ditë joreale. Kam pasur nderin e madh që të marr Urdhrin Naim Frashëri nga Presidenti i Shqipërisë, z. Bajram Begaj. Kjo është diçka që u jepet shqiptarëve dhe qytetarëve të huaj për veprat dhe veprimtaritë e tyre të vlefshme në shkencë, art dhe kulturë. Faleminderit shumë nga thellësia e zemrës sime.”
