Pak javë më parë familja e këngëtarit të njohur, Alban Skënderaj, u trondit nga lajmi i hidhur se nëna e tij ndërroi jetë. Dhimbja është ndjerë nga të gjithë, pasi Albani e ka transmetuar me dedikimet e tij aq të ndjera. Por jo vetëm ai. Edhe babai i tij, Qerim Skënderaj, ka shkruar disa vargje shumë të dhimbshme për bashkëshorten e tij. Nëna e këngëtarit humbi jetën për shkak të një sëmundjeje të rëndë.
SI KE FJETUR?!…
E dhëmbshura ime, mirmëngjes.
Si ke fjetur, aty poshtë, pa mua?
Erdha prap sot, të përshëndes,
Dhe sërish të them se sa të dua.
Unë, këtu lartë, s’fjeta fare,
Preka, bashkë me ty, çdo kujtim.
Shpirtin ma pushtoi një brengë e madhe,
Lodhja jote…, vidë pambarim…
Tani shlodhu, e lodhura ime.
Prej këtej, ike punëmbaruar.
Bijtë e tu, vepra më sublime,
S’e harrojnë klloçkën e munduar.
Ja dhe pakë, e do të kenë rrethuar,
Duart plotë me lule gjithë shkëlqim.
Shpirti yt, me mall i ka bekuar,
Ndaj me lotë e shprehin dashurinë.
Po ti fli, prehu pa merak,
Lulet s’do t’i ndajmë asnjë ditë.
Tani sapo shtova një zambak,
Të rri hijshëm, si një luledritë…
Kur të zgjohesh, na vështro nga lartë,
Jemi të bashkuar si përherë,
Prandaj mbrona me krahët e artë,
Syri i lig, nuk derdh lotë, por vrer.
