Në çdo kohë Aurela Gaçe është shquar për stilin mjaft të veçantë në të veshur. Nuk i pëlqen të jetë e njëjtë dhe eksperimentimet në ‘look’ janë të shpeshta. Si një kameleon i vërtetë e kemi parë të transformuar në çdo lloj stili. Të gjithë mund të keni fiksuar një model fustani të veçantë të saj, por është e sigurt se të gjithë e kujtoni shumë mirë fustanin e punuar me disqe që tërhoqi vëmendjen kur këngëtarja u ngjit në skenën e ‘Kënga Magjike’. Megjithëse është një njeri që nuk preferon të këndojë me ‘CD’, Aurela vendosi që pasionin e saj për muzikën ta materializonte në veshje.
Ideja për një fustan të tillë ishte e saj, ndërsa realizimi ishte i Joni Peçit. Kanë kaluar pothuajse 3 vite nga ajo kohë dhe së fundmi të njëjtën ide e kemi parë në një nga firmat më të njohura të modës. Në veshjet e ‘Moschino’ kemi parë një stil të ngjashëm me atë të këngëtares shqiptare, por të realizuar në formën e printit me ‘CD’. Kjo duhet të jetë një rastësi shumë e bukur, por duhet pranuar se Aurela është gjithmonë një hap përpara. Së fundmi me këtë veshje është parë edhe këngëtarja shqiptare me origjinë botërore, Bebe Rexha. /revistawho.com
