Dita e parë e pranverës përkon edhe me ditën e Tiramisusë, ëmbëlsirës shumë të dashur italiane që ka filluar të bëhet simbol i atij populli krah pastave dhe picës. Kjo ëmbëlsirë nga ata që e pëlqejnë dhe e gatuajnë kosiderohet si ikona e gëzimit dhe ëmbëlsisë, po ka truket e veta për t’u realizuar në perfeksion. 6 këshillat kryesore po ua listojmë më poshtë dhe meqë kemi fatin të jemi në shtëpi, si për të dielë dhe ditë me shi, festojeni këtë ditë me një tiramisu.
Sekreti i parë për tiramisunë perfekte është mascarpone e freskët dhe e fortë. Ndaj tregoni kujdes për të parë datën kur e blini maskarponen. Dhe përdoreni sapo e nxirrni nga frigoriferi.
Vezët po ashtu duhet të jenë të freskëta, por duhen lënë në temperaturë dhome 2 orë para se t’i thyesh. Vetëm kështu e verdha dhe e bardha e saj do të përzihen në mënyrë perfekte.
Kafja duhet të jetë e pastër: e fortë dhe esenca e saj e papërzier me sheqer apo shtesa të këtij lloji. Mos hidhni as alkool. Nëse tiramisuja ka vetë sheqer, kafja me sheqer vetëm do e rëndojë, ndërsa nëse i hidhni alkool, ai do mbizotërojë si shije.
Biskotat e pastiçerisë janë shumë të buta. Më e mira është të zgjidhni ato të paketuarat që janë pak të forta në anë dhe nuk zbuten shumë edhe kur zhyten në kafe.
Një e bardhë veze do e bënte kremin më të butë dhe shumë më të shijshëm. Nëse të bardhën e vezës nuk e përdorni, ne ju sugjerojmë ta bëni.
Që shijimi i tiramisusë të jetë perfekt, duhet ta gatuani një ditë para dhe ta konsumoni ditën pas.
