Një tjetër emër shqiptar po tërheq vëmendjen ndërkombëtare. Brendon Ahmeti, i njohur së fundmi për përfshirjen e tij në listën prestigjioze “Forbes 30 Under 30 – Listmaker”, është CEO dhe bashkë-themelues i startup-it vienes Synaps, një kompani që po tërheq investime dhe interes të madh në industrinë europiane të teknologjisë.
Sipas Forbes, Ahmeti ka bashkëthemeluar Synaps me Kevin Cobaj (CTO) dhe Agron Bajraktari (COO), ndërsa kompania synon të krijojë një platformë të tipit “Canva për arkitekturën”, duke u mundësuar përdoruesve të përshkruajnë hapësirat që duan të projektojnë dhe platforma t’i shndërrojë ato menjëherë në dizajne të sakta dhe të gatshme për zbatim.
Para se platforma të dilte zyrtarisht në treg, ekipi arriti të siguronte 1.4 milionë euro financim, ndërsa thuhet se rreth 8 mijë kompani janë tashmë në listë pritjeje për ta përdorur shërbimin.
“Forbes” thekson se lista e plotë e 30 Under 30 gjendet në uebfaqen e tyre zyrtare.
Ky është një tjetër sukses i rëndësishëm i një të riu shqiptar në teknologjinë botërore – dhe për publikun shqiptar, padyshim lajm i veçantë, pasi Brendon Ahmeti është djali i moderatores së mirënjohur të ekranit, Aida Shtino.
