Historia e një djali që dëshironte të bënte të lumtur babain e tij dhe t’i jepte atij një mesazh për jetën çeli mbrëmjen e sotme të programit “Dua të të bëj të lumtur”. Kjo ishte historia e Florianit, i cili në studio rrëfeu historinë e jetës së babait të tij, Zefit. Gjatë gjithë jetës së tij, Zefi ishte munduar që fëmijët e tij të ishin të lumtur dhe të mos u mungonte asgjë, por para disa viteve ai kishte pësuar një trompozë. Fatkeqësisht kjo trompozë i kishte shkaktuar atij edhe probleme të tjera shëndetësore duke e bërë që Zefi të kalonte një periudhë të madhe kohe nëpër spitale. Për këtë arsye Floriani kishte zgjedhur programin “Dua të të bëj të lumtur” për t’i thënë që të mos dorëzohej dhe të vazhdonte që të jetonte. “Babi unë kam ardhur këtu sepse në jetën time kam bërë shumë gabime, por ty nuk të kam parë kurrë të lumtur. Të premtoj se unë do të jem pranë teje kudo që të shkosh, ashtu siç të kam pasur unë, ty. Të kam sjellë këtu për të të thënë që jam krenar që të kam baba dhe që të dua shumë, prandaj jetoje jetën për ne!”,- tha Floriani. Zefi u shpreh duke thënë se nuk e priste kurrë që do të ishte Floriani në anën tjetër të ekranit dhe se ndihej tepër i lumtur për këtë surprizë të bukur./revistawho.com
