Pas muajsh spekulimesh, Ariana Grande ka reaguar drejtpërdrejt ndaj zërave që sugjeronin largimin e saj nga muzika. Në një postim në Instagram, artistja ka treguar se pavarësisht projekteve të shumta që ka në duar, muzika mbetet një pjesë thelbësore e jetës së saj.
Krahas një videoje ku performon në Met Gala 2024, ajo shkroi:
“Shumë budallallëk nga ana juaj të supozoni se vetëm sepse kam duar të zëna me shumë gjëra, kam ndërmend të braktis këngën dhe muzikën…!!!”
Albumi i saj i fundit “Eternal Sunshine” u publikua vitin e kaluar, ndërkohë që ajo po shkëlqen edhe në rolin e saj të ri në filmin “Wicked”. Megjithatë, Grande sqaroi se përkushtimi ndaj muzikës nuk ka ndryshuar, ndonëse mënyra e të qenit artiste sot është më ndryshe për të.
“Mund të mos duket tamam si më parë, por mua më pëlqen shumë mënyra se si duket në kokën time. Po argëtohem. Ndihem mirënjohëse, e emocionuar dhe e frymëzuar.” – shkroi ajo në postim.
Në mesazhin e saj, ajo shton edhe më tej:
“Ajo \[muzika] ka qenë dhe do të jetë gjithmonë shpëtimi im. Duhet të ketë vend për të gjitha. \[…] Po kërkoj balancën mes shumë projekteve dhe pasioneve që dua, dhe po e bëj në mënyrën time…”
Dhe për ata që mezi presin ta dëgjojnë sërish live:
“Po punoj për një plan që të këndoj për ju vitin tjetër. Edhe nëse është vetëm pak. Ju dua.”
Duket qartë se Ariana nuk ka ndërmend të largohet nga muzika – përkundrazi, ajo është në një fazë të re të krijimtarisë së saj, ku artistja po gjen mënyra të reja për të qenë e pranishme dhe autentike në artin që do.
