Denise Richards ka bërë një rrëfim tronditës në sallën e gjyqit, duke folur hapur për dhunën dhe frikën që përjetoi gjatë martesës me ish-bashkëshortin e saj, Aaron Phypers. Aktorja, e cila ka kërkuar një urdhër kufizimi ndaj tij, u shfaq me lot në sy ndërsa përshkroi episodet e rënda të abuzimit.
“Ai gati sa nuk më vrau,” deklaroi Richards, duke shtuar se Phypers e kërcënonte shpesh se do ta hidhte nga dritarja apo ballkoni i hotelit ku qëndronin.
Në dëshminë e saj, aktorja tregoi edhe momentin që çoi në ndarje: “Ai u zemërua shumë me mua, ishte i paqëndrueshëm. Në atë kohë, sapo isha shëruar nga një lifting i plotë i fytyrës dhe ende kisha qepje pas veshëve. Ai më kapi për krahësh, më bërtiti dhe më ofendoi, duke më quajtur ‘mashtruese dhe gënjeshtare’,” – rrëfeu ajo.
Richards shtoi se ndjehej e frikësuar: “Ishte e vështirë për mua ta pranoja. Jam shumë më e vogël se ai.” Sipas dëshmisë, një ditë më pas, Phypers dhe babai i tij hynë në dhomën e saj dhe e kërcënuan se do të publikonin foto nudo të saj. Aktorja pretendon gjithashtu se ish-bashkëshorti e goditi në fytyrë dhe kokë, duke e kërcënuar se do ta vriste.
Phypers ka mohuar të gjitha akuzat, ndërsa Richards këmbëngul se abuzimi ishte i vazhdueshëm dhe se kishte frikë për jetën e saj. “Nuk e besoja dot se njeriu që doja mund të më trajtonte ashtu,” është shprehur ajo.
Ngjarja ka tronditur publikun amerikan, ndërsa gjykata pritet të vendosë nëse urdhri i përkohshëm i kufizimit do të shndërrohet në të përhershëm.
