Një natë absolutisht magjike e muzikës dhe kulturës evropiane është përmbyllur me kurorëzimin e Ukrainës si fituese e Eurovision Song Contest 2022, i cili u mbajt në Torino.
Grupi fitoi me këngën “Stefania” këtë edicion të Eurovision Song Contest.
“Kurajo jonë ka habitur botën, muzika jonë e ka pushtuar Evropën”, kështu ka zgjedhur ta urojë fitoren e grupit ukrainas, Kalush Orchestra, presidenti, Volodymyr Zelensky.
Nëpërmjet një shkrimi shumë të shkurtër në median Telegram, ai jo vetëm ka uruar fituesit, por edhe ka dhënë shpresë për mbajtjen e festivalit të vitit tjetër dhe jo në Kiev, por në Mariupol!
“Do të bëjmë më të mirën tonë që një ditë të mirëpresim pjesëmarrësit dhe të ftuarit e Eurovisionit në Mariupolin ukrainas. Të lirë, të paqtë dhe të rindërtuar”.
Kjo është shpresa e presidentit Zelensky, në një kohë aspak të lehtë për vendin e tij.
Duke dhënë këtë indicie mbi dëshirën për ta zhvilluar festivalin më të madh muzikor kontinental në Ukrainë, ai tregon edhe një qasje pozitiviste, pasi Mariupoli mendohet se është qyteti më i dëmtuar nga agresioni rus dhe bilanci i jetëve të humbura atje, është ende i paqartë.
