Pas disa ditësh thashetheme dhe raportimesh që qarkulluan në media online, Bieta Sulo ka vendosur të flasë vetë dhe të sqarojë të gjithë situatën rreth të ardhmes së saj në ekranin e Top Channel.
Në hapje të emisionit “Ftesë në 5”, moderatorja u ndal pikërisht te lajmi që kishte qarkulluar me shpejtësi në rrjet: se ajo do të largohej nga televizioni ku ka ndërtuar karrierën për dy dekada.
“Një tjetër lajm shumë i diskutuar i fundjavës ka qenë largimi i Bieta Sulos nga Top Channel. Aq sa dhe njerëz shumë të afërt më shkruanin: ‘Çfarë po ndodh?’ Lajmi merr dhenë dhe besohet edhe nga njerëz të afërt në përmasa të tilla. Madje dhe punëtorët e skenografisë kur erdha sot më thanë: ‘A ta vazhdojmë këtë punë?’”, u shpreh ajo drejtpërdrejt.
Për të gjithë ata që prisnin një konfirmim për largimin e saj, përgjigjja ishte e prerë:
“Ka zierë rrjeti për këtë gjë, por që këtu do të jem në Top Channel. Përkon me 20 vitet e mia në Top Channel, dhe në këtë 20 vjetor, jo vetëm që do të jemi nga shtatori së bashku, por është duke u punuar për një skenografi të re për të ardhur në një sezon të ri televiziv me më shumë energji dhe vrull, pas 7 vitesh të suksesshme që kemi lënë pas.”
Sipas disa portaleve, sezoni aktual mund të ishte i fundit për Bietën në rolin e moderatores dhe autores së “Ftesë në 5”, me aludime për një kalim të mundshëm të saj në Radio Televizionin Shqiptar. Por ajo e hodhi poshtë kategorikisht këtë skenar.
