Një moment i rrallë dhe thellësisht emocional ka ndryshuar dinamikën e “Big Brother VIP Albania”, duke e vendosur Selinin përballë një dileme që shkon përtej lojës. Takimi me të ëmën, që pritej si një moment mbështetjeje, u kthye në një përballje të fortë, ku familja hyri drejtpërdrejt në vendimmarrjen e saj për vazhdimin e garës.
Fjalët e nënës erdhën të drejtpërdrejta, pa filtra dhe me një peshë të rëndë emocionale: “Sot duhet të vish me mamin në shtëpi. Ti i përket dyerve të artit. 48 orët e fundit kanë qenë përdhosje dhe përulje shumë e madhe”. Një apel që jo vetëm tronditi Selinin, por ngriti edhe një pyetje të fortë mbi kufirin mes lojës dhe dinjitetit personal.
E prekur dhe mes lotësh, banorja reagoi duke mos u tërhequr nga qëndrimi i saj në lojë, por duke adresuar drejtpërdrejt tensionet e krijuara brenda shtëpisë: “Dy burra janë munduar të ulin imazhin e një vajze, që në fund fare është vetëm një vajzë. Dy shfrytëzues të degjeneruar, që kam një mllef aq të madh tani. Dy njerëz të atij niveli, burra të atij niveli të fitojnë në krahët e një vajze nuk do ta lejoja kurrë. Ata të dy, Rogerti dhe Miri do mbajnë përgjegjësi për fjalët që kanë thënë”.
Në një reflektim edhe më personal, ajo shtoi: “Ndihem shumë e ngarkuar, fjalët e mamit për mua janë shumëgjë. E vetmja gjë që më ngrohu ishte që nuk ishin mërzitur me mua. Me qëndrimin tim këtu brenda, ato persona që kanë bërë ato deklarime gjatë 48 orëve të fundit do të mbajnë përgjegjësi”. Një deklaratë që e vendos Selinin mes dy botëve, asaj të familjes dhe asaj të lojës, pikërisht në momentin më vendimtar të rrugëtimit të saj televiziv.
