Pas përplasjeve dhe tensioneve të gjata mes dy reperëve të njohur, Don Xhoni dhe Stresi, më në fund është rikthyer paqja mes tyre. Ish-deputeti Gani Geci ka luajtur një rol vendimtar në pajtimin e tyre, duke i ftuar të dy artistët në kullën e tij në Llaushë.
Në një postim në Facebook, Geci ndau një fotografi me dy reperët, duke konfirmuar pajtimin e tyre. Në mesazhin e tij, ai theksoi rëndësinë e unitetit mes shqiptarëve dhe domosdoshmërinë e shmangies së përçarjeve.
“Të dashur miq, sot në kullën tonë ishin të pranishëm dy artistë të mëdhenj të muzikës rep: Stresi – Arkimed Lushaj nga Shqipëria dhe Don Xhoni nga Kosova. Motoja jonë është: ‘Jemi pak për t’u ndarë, jemi pak për t’u përçarë, jemi pak për t’u sharë mes vete.’ Shqipëria dhe Kosova janë një dhe gjithmonë do të mbeten një. Zoti e bekoftë Shqipërinë dhe Kosovën!”, shkroi ai.
Geci bëri të ditur se Don Xhoni dhe Stresi kanë shtrënguar duart dhe kanë rënë dakord për të lënë pas mosmarrëveshjet, duke rikthyer miqësinë e tyre të mëparshme. .
