Përplasja e brendshme mes familjes Beckham duket se po vazhdon. Brooklyn Beckham, djali i madh i David dhe Victoria Beckham, ka lënë të kuptohet për tensionet familjare përmes një videoje të re të publikuar në Instagram, ku shfaqet duke gatuar me shefin e njohur Michel Roux Jr.
26-vjeçari, i cili së fundmi është fokusuar në promovimin e markës së tij Cloud23, udhëtoi nga Los Anxhelesi në Londër për të filmuar recetën në kuzhinën e restorantit Wigmore në hotelin Langham. Në video, Brooklyn përgatiti një pjatë me bazë proshutën, të shoqëruar me salcën e tij pikante, por ajo që tërhoqi vëmendjen ishte një deklaratë me tone thumbuese ndaj familjes së tij.
“Ky gatim ishte e vetmja gjë për të cilën ia vlente të merrja avionin,” u shpreh ai, duke lënë të kuptohet se nuk kishte ndonjë arsye tjetër të udhëtonte drejt Mbretërisë së Bashkuar.
Brooklyn është parë për herë të fundit me prindërit dhe vëllezërit e tij në Krishtlindjet e fundit. Që prej asaj kohe, marrëdhëniet e tij me familjen duken të ftohta, pasi vizitat në Angli kanë qenë kryesisht për arsye pune – përfshirë edhe një reklamë të Moncler, të xhiruar me bashkëshorten e tij Nicola Peltz, 30 vjeçe.
Ky zhvillim i fundit pritet të ndezë edhe më shumë zërat për krisjet brenda një prej familjeve më të famshme britanike.
