DROGA/ Historia e vajzës nga Përmeti, që lindi foshnjën në burgun turk

Dënimet e ashpra që parashikon legjislacioni turk për çështjet e drogës, por edhe kontrollet e ashpra në kufi, duket se ua bëjnë të vështirë trafikimin e lëndëve narkotike shtetasve shqiptarë. Megjithatë të shumtë janë ata që kanë rrezikuar, duke përdorur forma nga më të ndryshmet për të fshehur drogën që trafikonin. Aktualisht në burgjet e Turqisë ndodhen duke vuajtur dënimin 25 shtetas shqiptarë. Mes tyre është edhe një vajzë 21-vjeçare nga Përmeti, e cila është dënuar me 25 vjet burg. Bëhet fjalë për Anxhela Zekollarin, e cila në maj të vitit të kaluar, u arrestua në kufirin mes Turqisë dhe Greqisë, bashkë me të fejuarin e saj, raporton “Panorama”. Në trup iu gjet e fshehur një sasi prej 2.5 kg hashash, që e kishte paketuar në formën e një jeleku, të veshur poshtë rrobave. E megjithëse sasia mund të konsiderohet e vogël, krahasuar me rastet e tjera të trafikut ndërkombëtar të drogës, ajo sërish ka marrë dënim maksimal. Madje gjyqtarët turq nuk i ka “zbutur” as fakti që ajo ishte shtatzënë, duke vendosur që ajo të dënohet me 25 vjet heqje lirie. Tashmë ajo ndodhet në burg, bashkë me foshnjën e saj, që për shkak të rrethanave u detyrua ta lindë aty. Avokati shqiptar, Kadri Hoxha, i cili prej shumë vitesh ushtron profesionin e tij në Stamboll, u bën apel bashkatdhetarëve të tij që të mos rrezikojnë të trafikojnë drogë atje, pasi dënimet janë shumë të ashpra dhe askush nuk tolerohet.