“Dua vëlla-dua vëlla”, mami Artenisa, babi Olsi dhe ëndrra e Abigail që u bë realitet!

Dy ditë më parë në familjen e moderatores Artenisa Ozaj dhe sipërmarrësit Olsi Bogo mblodhën miqtë dhe familjarët për të festuar ditëlindjen e këtij të fundit. Por jo vetëm kaq. Artenisa, Olsi dhe vogëlushja e tyre Abigail ndanë me të dashurit e zemrës një lajm të ëmbël mjaltë. Një bebush tjetër është rrugës. Dhe sigurisht një “baby gender reveal” për ta kulmuar festën. Ashtu si në të gjitha festat e tjera të këtij lloji, përballë janë dy grupe. “Team-boy” të cilën e ka kryesuar Abigail dhe “Team girl”. Dhe familjes do t’i shtohet një djalë. Pas publikimit të videos në rrjetet sociale, ku familjarët sigurisht vraponin të përqafonin çiftin, komentet nuk kanë munguar. Sigurisht tema e komenteve është “gëzohen shumë se është djalë, po të ishte vajzë?”. Ka qenë Artenisa ajo që e ka sqaruar këtë pjesë. Për revistën “Who”, ajo thekson se djalë-vajzë për ta është njësoj, duke shtuar se ka qenë dëshirë e madhe e vajzës të ishte djalë.
“Sapo mori vesh që isha shtatzënë, Abigail kërkonte vëlla. E donte patjetër djalë. Edhe pse mundoheshin t’ia shpjegonim se kjo nuk ishte në dorën tonë dhe se mund të ishte motër, ashtu siç mund të ishte vëlla, ajo përsëri insistonte. Madje dhe gjatë festës iu kërkonte të ftuarve të votonin për djalë. Ishim ndarë në “team-boy” dhe “team-girl” dhe unë isha me këtë të fundit. Jemi rritur dy vajza në shtëpinë tonë dhe doja që Abigail të kishte një motër. Por sigurisht jemi shumë të lumtur që në familjen tonë do të vijë një djalë dhe më tepër që u plotësua dëshira e vajzës. Familjarët u gëzuan për ne dhe ishin emocione të akumuluara nga Abigail që mezi po pret vëllain”, ka thënë Artenisa.

Kudo në botë në festat “baby gender reveal” grupet janë të ndara në dy, dhe gëzojnë po njësoj siç edhe kanë gëzuar dhe reaguar familjarët e miqtë e Artnenisës dhe Olsit.
Rëndësi ka që bebushi të vijë me plot shëndet dhe do të jetë i rrethuar me shumë dashuri.