Këngëtarja shqiptare Samanta Karavella ka ndarë një nga rrëfimet më personale të saj deri më tani, duke folur hapur për përvojën e mëmësisë dhe sfidat emocionale që përjetoi pas lindjes së fëmijës së saj të parë. Në një intervistë në emisionin “Mirëmbrëma Yje” me moderatoren Arbana Osmani, artistja tregoi se ardhja në jetë e vajzës së saj ndryshoi gjithçka në jetën e saj brenda vetëm një dite.
Karavella rrëfeu se periudha pas lindjes ishte shumë më e vështirë nga sa kishte imagjinuar, duke pranuar se përballja me postpartum ishte një nga përvojat më sfiduese të jetës së saj. “Postpartum ishte më i fortë se unë, më mundte çdo ditë. Punova shumë me veten time, i flisja vetes time që ‘kjo është kalimtare, do ia dal mbanë, nuk është kaq e vështirë sa është tani, do të mësohem’, por ishte hera e parë në jetë që realisht kuptova që kjo gjë ishte shumë më e fortë se unë, ndoshta një nga eksperiencat e mia në jetë më të vështira që kam bërë”, u shpreh ajo me sinqeritet.
Artistja tregoi se momenti i parë me vajzën e saj ishte një përzierje emocionesh të forta dhe pasigurish. “Ndryshimi i jetës sime brenda 24 orëve ishte një transformim shumë i madh. Nuk e dija çfarë më priste. Kisha dëgjuar shumë që jeta të ndryshon, por nuk e kupton deri në momentin që e provon”, tha Karavella, duke shtuar se për një moment humbi edhe sensin e kohës dhe ndjeu pasiguri për rolin e ri si nënë.
Megjithatë, këngëtarja theksoi se me kalimin e kohës ajo dhe partneri i saj gjetën forcën për ta përballuar këtë kapitull të ri. “E gjetëm forcën të dy, mësuam të dy padiskutim, por nuk është vetëm kaq. Jeta ime ndryshoi! Thuhet që jeta e baballarëve nuk ndryshon sepse ata zgjohen dhe shkojnë në punë, ama jeta ime ndryshoi plotësisht sidomos si artiste”, u shpreh ajo, duke treguar se mëmësia jo vetëm që transformoi jetën e saj personale, por edhe mënyrën se si ajo e sheh veten dhe karrierën artistike.
