Në botën ku dashuria zakonisht matet me gjeste romantike, Virginia Fonseca thotë se marrëdhënia me yllin e Real Madrid, Vinicius Jr, matet edhe me listën e produkteve që mund të rrezikojnë karrierën e tij.
Influencuesja braziliane, një nga emrat më të ndjekur në rrjetet sociale, ka folur hapur për një detaj që i ka habitur edhe çiftet jashtë botës së sportit: intimiteti, edhe kur është krejt privat, mund të ketë pasoja publike.
Sipas saj, frika më e madhe është një test antidoping që mund të dalë pozitiv jo nga “çmenduri” apo tradhti rregullash, por nga një krem, një pomadë, një produkt i përditshëm. Virginia e shpjegon thjesht, substanca të caktuara mund të transferohen edhe përmes kontaktit fizik dhe lëngjeve trupore, duke krijuar rrezik real për një sportist në nivelin e Vinicius.
Prandaj, rregulli i tyre është i prerë:
“Nëse shkoj te gjinekologu dhe kam nevojë të përdor një pomadë, duhet të konsultohem me fizioterapistin e tij. Sepse mund të shkaktojë një pozitivitet në doping”.
Dhe kjo nuk është vetëm teori. Ajo rrëfen reagimin e saj kur e kuptoi seriozisht çfarë do të thotë kjo.
“Kur ma shpjeguan këtë gjë, u tremba shumë… Fillova të dridhesha,” thotë ajo, duke pranuar se në mendje i kaloi menjëherë ideja, “po nëse kam përdorur diçka që nuk duhet?”.
Që prej asaj dite, çdo gjë kalon në “filtrin Vinicius”. Siç e përmbledh ajo:
“Çdo gjë që mendon të përdorësh, duhet të më njoftosh paraprakisht…”, ndërsa në një tjetër formulim ajo shprehet më tej:
“Edhe një krem duhet ta diskutojmë më parë”.
Këto rregulla, sipas saj, shtrihen edhe në rutinën e përditshme, kujdes maksimal, disiplinë, dhe një jetë e planifikuar me detaje, jo thjesht për perfeksion, por për mbijetesë profesionale në elitën e futbollit.
Megjithatë, Virginia e mbyll me një ton që e bën historinë edhe më njerëzore:
“Është një marrëdhënie kërkuese: duhet të kesh orar për gjithçka, të ndjekësh gjithçka në mënyrë perfekte. Jam shumë e lumtur me të”.
