E bija çon në vend amanetin e Fatbardh Smajës, vjen në teatër “Dashuritë e Xhorxh Washingtonit

“Dashuritë e Xhorxh Washingtonit” nga Miro Gavran vjen për publikun e Tiranës në skenën e Teatrit Eksperimental “Kujtim Spahivogli”. Për dy netë me radhë, 3 dhe 4 mars, drama vjen në skenë nga teatri “Migjeni” i Shkodrës. Pas mikpritjes që kjo dramë pati në qytetin e Shkodrës gjatë muajit shkurt, i takon publikut në Tiranë që të shikojë lojën e dy aktoreve të reja, Sara Smaja dhe Kristiana Dodaj. Pas ndarjes nga jeta të Fatbardh Smajës, që do të ishte regjisori, dy aktoret, në fillimet e karrierës e morën përsipër ta realizonin vetë shfaqjen e shkruar nga autori i njohur Gavran. Dy protagonistet e dramës Kristiana Dodaj dhe Sara Smaja këtë të enjte dhe të premte janë në skenën e teatrit “Kujtim Spahivogli”, ndërsa e bija e regjisorit, Sara, e shikon këtë vepër në skenë dhe si një amanet të babai të saj. “Është vepër që vihet për herë të parë në skenë në Shqipëri. Ne na e dha përkthyesi Rudi Erebara. U mor për tu bërë projekti i rradhës në teatrin “Migjeni” dhe do punohej nga regjisori i teatrit (babi) sapo ai të mbyllte premierën me “Kandilin e Argjendit”, mirëpo për premierën e kësaj të fundit ai u sëmur dhe ndodhi ajo çfarë ndodhi.., kështu që ky projekt u pezullua për një farë kohe, për ta rimarë edhe njëherë në janar këtë herë vetëm ne aktoret. Preferuam ta punonim vetë, sepse ishte një lloj amaneti që më kishte lënë babi. Pra për pasojë shfaqja nuk ka regjisor, çdo gjë është bërë nga unë dhe Kristiana”, tregon aktorja Sara Smaja për “SOT”. Shfaqja që vjen dhe në skenën e teatrit në Tiranë, e pati premierën më datë 26 shkurt në qytetin e Shkodrës tek Qendra Rinore Arka, sepse teatri për momentin është në rikonstruksion, ku pas përfundimit të këtij procesi drama do të jetë dhe në skenën e “Migjenit”. Dy aktoret kanë qenë dhe në një kurs në Akademinë e Arteve, ku Sara vjen në skenë e teatrit me rolin e Marta Washington. “Roli im, gruaja e presidentit të Amerikës, ku Silvia Karver dashnorja e tij interpretohet nga Kristiana, të dyja takohen pas vdekjes së Xhorxh Washingtonit për të folur për të. Është një pjesë, që tregon se gjërat nuk janë gjithmonë ashtu siç duken dhe nuk duhet ti gjykojmë gjërat nga jashtë asnjëherë qoftë edhe kur kemi të bëjmë me politikanë dhe çështjet e tyre familjare”, tregon aktorja Sara Smaja.